31 жніўня і 1 верасня ў аграгарадку Квасоўка на пляцоўцы ля возера адбудзецца раённы фестываль фальклору “Вяртанне да вытокаў”. Пачатак фестывалю у 12.00.
31 жніўня з 12.00 гасцей свята чакае праца традыцыйных беларускіх падворкаў, выстава-кірмаш, конкурс беларускіх народных страў і майстар-клас традыцыйных рамёстваў.
Разам затанчыць ды пагуляць абяцае Суполка традыцыйнай культуры (Гродна) і капэла “На таку” (Мінск), які арганізуюць невялікую этнавечарыну па побытавых танцах Гарадзеншчыны.
Далей удзельнікаў чакае фальклорная праграма ад калектываў гарадзенскага раёна. Бліжэй да вечару выступяць госці фестывалю: Народная фальклорная група “Вяргіня” (Шчучынскі раён), Узорны фальклорны ансамбль “Верабейкі” пад кіраўніцтвам Сяргея Выскваркі (Любань, Мінская вобласць).
Выступіць таксама гурт дударскай музыкі і этнічных спеваў “Ветах” Пад кіраўніцтвам Вячаслава Калацэя і Таццяны Пладуновай (Мінск, Беларускі дзяржаўны універсітэт культуры і мастацтваў).
У другі дзень адбудзецца конкурс фальклорнай творчасці “Адвечная спадчына”. Удзельнікі розных узростаў пазмагаюцца ў намінацыях: народныя спевы (сольныя і гуртавыя), побытавыя танцы і народныя казкі ды байкі.
Арганізатары фестывалю – Гродзенскі раённы выканаўчы камітэт, Аддзел ідэалагічнай работы, культуры і па справах моладзі, Гродзенскі раённы метадычны цэнтр народнай творчасці і культасветработы – шчыра запрашаюць акунуцца ў свет беларускай традыцыі.
Комментариев нет:
Отправить комментарий